ژینامێدیا: هاوپەیمانیی هێزە سیاسییەکانی کوردستانی ئێران، نیشانە و لۆگۆیەکی نوێی بۆ خۆی هەڵبژارد کە هەڵگری واتا و هێمایەکی قووڵی مێژوویی و نەتەوەییە.

ئەم نیشانەیە تەنیا دیزاینێکی سادە نییە، بەڵکو گوزارشتە لە یەکگرتوویی و ڕەوایی بزووتنەوەی ڕزگاریخوازی ڕۆژهەڵاتی کوردستان. لێرەدا وردەکاریی شیکردنەوەی ئەم لۆگۆیە دەخەینە ڕوو:

ڕەگ و ڕیشەی مێژوویی:

دیزاینی لۆگۆکە لە خۆری سەر شوێنەواری "قزقاپان" وەرگیراوە. ئەم شوێنەوارە کە دەکەوێتە هاوێنەهەواری "چەمی ڕێزان" لە پارێزگای سلێمانی، مێژووەکەی بۆ ساڵانی (٥٨٥-٥٩٠)ی پێش زایین دەگەڕێتەوە.

هێمای ئاشتی و دەسەڵات:

قزقاپان مەزاری "هەڤەخشتەرە" (کیاکسار)، سێیەمین پاشای ئیمپراتۆریەتی مادە. ئەم شوێنەوارە وەک یادگارییەک بۆ کۆتاییهاتنی جەنگێکی ٥ ساڵە لەنێوان ماد و لیدیا دروست کراوە؛ کاتێک لە ساڵی ٥٨٥ی پێش زایین خۆرگیران ڕوو دەدات، هەردوولا وەک نیشانەیەکی پیرۆز دەیبینن و پەیمانی ئاشتی دەبەستن.

گۆڕانکاری لە تیشکەکاندا:

لە کاتێکدا خۆرە ڕەسەنەکەی قزقاپان خاوەنی ١١ تیشکە، لە نیشانی هاوپەیمانییەکەدا کراوەتە ٢١ تیشک. ئەم گۆڕانکارییە بە دوو ئامانج کراوە:

1. وەفاداری بۆ مێژوو: پاراستنی شێوە بنەڕەتییەکەی خۆری مادەکان.
2. تەبایی نەتەوەیی: گونجاندن لەگەڵ ٢١ تیشکی نێو ئاڵای کوردستان و هێما نەتەوەییەکانی دیکە کە پەیوەستن بە ژمارە ٢١ـەوە (وەک نەورۆز).

ئەم لۆگۆیە لەم قۆناغەدا دەبێتە ناسنامەی یەکگرتوویی هێزە سیاسییەکان و جەختکردنەوە لەسەر بەردەوامیی مێژوویی کورد لەسەر خاکەکەی.