دوو هاووڵاتیی کوردی خەڵکی سەقز بە ناوەکانی مستەفا میسری و حامید نەباتی، لەلایەن هێزەکانی ئیتلاعاتی کۆماری ئیسلامیی ئێرانەوە دەستبەسەر کران و بۆ شوێنێکی نادیار گوازرانەوە.
بەپێی سەرچاوەیەکی ئاگادار، ئەم دەستبەسەرکردنانە ڕۆژی دووشەممە ٢٩ی کانوونی یەکەمی ٢٠٢٥ (٨ی بەفرانباری ١٤٠٤) ڕوویان داوە، کە تێیدا هێزەکانی ئیتلاعات مستەفا میسری، چالاکی مەدەنی و ئەندامی گرووپی شاخەوانیی سەقز و حامید نەباتی، کاسبکاری ناوخۆییان لە شوێنی کارەکەیان و بەبێ نیشاندانی فەرمانی دادوەری دەستبەسەر کردووە.
ئەو سەرچاوەیە هەروەها ڕایگەیاند کە لە کاتی دەستبەسەرکرانیانەوە، هەر دوو هاووڵاتییەکە لە پەیوەندیگرتن بە بنەماڵەکانیان و دەستڕاگەیشتن بە پارێزەر بێبەش کراون. هیچ زانیارییەکی فەرمی سەبارەت بە شوێنی ڕاگرتنیان یان ئەو تۆمەتانەی خراونەتە پاڵیان بڵاو نەکراوەتەوە.
دەستبەسەرکردنە سەرەڕۆییەکان و بێبەشکردن لە مافە سەرەتایی و یاساییەکان، هێشتا بووەتە هۆی نیگەرانیی جیدی لەلایەن چاودێرانی مافی مرۆڤەوە، بەتایبەتی لە ڕۆژهەڵاتی کوردستان.
0
0